CRYPTO CURRENCY LEH PONZI SCHEME (Chiahpuam)

Tunlai thalai ten zawhna min rawn zawh zin deuh ber pakhat chu...hetiang deuh hian a ni a, (H - Huxley, C - Client)

C - "Crypto Company ah hian pawisa ka invest a, a tirah chuan ka withdraw thei reng a, mahse hei withdraw leh tur chuan pawisa deposit belh a ngai an rawn ti zel tawh a, deposit tur ka nei tawh silo a, ka lachhuak thei tawh lo a, an rintlak em minlo ensak teh hei hi an website ania".

H: "Ngatinge i invest a ?"

C: "Nia an rawn fakna velah hian a hlawk  hmel em a, ka ti ve ta lawm male."

C: "Instagram ah leh Youtube ah te."

H: "Cryto Currency te hi enge an nih i hrethiam em?"

A tlangpui ho channa -  "Hrethiam chiah lo, mahse pawisa peipunna (investna) ang chi ani tih chu ka hria a."

H: "Anih leh i invest tan tirh a i lakchhuah theih lai chuan engzat nge a pung an rawn pek che a."

C: "A tirah chuan a let thawk thawk in min rawn pe let thin a, tichuan ka dah belh tam tial tial a, a tang ta daih lawm."

H: "Ava pawi thin ve, hetiang hi Ponzi Scheme an tia Crypto Currency denchhanin mipui an rawn bum thin a ni. Lo hre hma deuh la tha tur ania aw."

Hetiang dinhmun ah hi chuan tih vak ngaihna hi a awm tawh thin lo.

Hetiang hian mi an bum dan chu ani tlangpui thin a. A pung an tiam zat te hi a let thawk te ani thin hun reilote chhungin, itawm tak mahse hlauhawm leh ngeiawm tak a ni.

Thut Policy hian Mizo te hi min bual â hneh tan tawh khawp mai, a te ber atanga a lian ber thleng mai hian. Mahse hausak thut hi chu tunge duh lo bik ang ni, kan pi leh pu te atang tawhin Pheichham leh Sekibuchhuak thawnthu nei kan lo ni ve tho a. Mizo te chauh hi kan lo ni bik lo e, hnamdang ramdang ah te pawh hian Thut Policy vang hian an buai ve tho. 

India danpui hian Crypto Currency lakah hian fimkhur turin a chah nasa hle bawk a, Kum 2017 December ni 5 RBI in thuchhuah a siamah pawh khan chiang takin a ziak a ni. Tichuan kum 2023 December 28 ah khan India Sawrkar chuan Crypto Currency lama company thahnem tak rintlak tura ngaih Binance hial pawh a zuah ta bik lo a nih kha.

Cryto Currency hi enge anih?

Computer (Khawl thluak nei) pawisa ti tawp hrih teh ang, Lekha Pawisa nilo, Bank Account ah dah luh pawh ngailo, Pawisa anga hman ve theih si, mahse Computer leh a kaihhnawih khawl hmang chauh a kal leh hman theih thil a ni. Tihian a tawi thei ang ber hian han dah ta zawk mai ila. Anihna takah chuan lekha pawisa (paper money) kan tih ho ai awh tu atana duan ani deuh reuh a, kan hma hun zelah chuan lekha pawisa ho hi chu a rawn la thlak vek tura ngaih ani a, mahse sum peipunna tha erawh ani hran lo a, a zirchianna tur hmanrua hi a tha lo a, a hlauhthawnawm dan pawh a sang viau bawk. Sum peipunna dang ho nen khaikhin pawh hian a hlauhthawnawm dan hi a sang fal bik a ni. (Technical lampang chuan rawn tarlang lo mai ila)

Kan thil hriatthiam miah loh a sum peipun tum hi a finthlak loh hle, itawm emaw a hlawk kan rin vang ngawta bawhzui hi chin thalo tak a ni. Rilru fim hmang lo a Phur thutna thinglung zawka sum leh pai dinhmun a thuthlukna siam hi a pawi thin. Chû mihring phur thutna thinlung rawn ti za zawk thei tur chuan Crypto Currency leh Ponzi Scheme chu Social Media hrang hrang ah an rawn chawhpawlh ta thin a, thang hlauhawm tak an rawn siam a, tamtak chu min awk ta thin a ni.

Engtinge kan in ven ang?

Zawhna tha tak ani a, Mizoram hi ziak leh chhiar thiam tamna State kan ni a, mahse ziak leh chhiar thiam ngawt hi Financial Education lama fin phahna alo nilo deuh a ni. Mite ber pawh thleng phak tur (Financial Education) Sum leh pai lama zirtirna hi kan mamawh tawh a ni. Zirtirna tha chuan finna min pe thei, finna chuan inbumna lakah min veng dawn a ni. Mizo te hian Financial Regulator te hi kan hriat a ngai bawk, Financial Regulator kan tih ho chu Sum peipun na lama mipui ho hmakhua ngaia sum peipunna rintlak lo nem nghet tute an ni. India rama Bank lam kaihhnawih a sum leh pai tih punna lam hrim hrim an rintlak na nemnghet tu chu Reserve Bank of India (RBI) anni.

Sum leh Pai dah punna tha, mi pawisa la khawm thei chin chuan RBI phalna an nei ngei tur a ni. Insurance lamah chuan IRDA (Insurance Regulatory and Development Authority) phalna nei ani bawk tur a ni. Stock Market lamah chuan SEBI (Securities and Exchange Board of India) hnuaia NISM (National Institute of Securities Market) Certifed te anni bawk tur a ni. Mutual Fund lam hi AMFI ( Association of Mutual Funds in India) anni a, PFRDA (Pension Fund Regulatory & Development Authority) lam hian National Pension Scheme ang te hi an enkawl thin bawk a ni.

Crypto Currency chu RBI hian a vil deuh ber a, mahse phalna mumal taka pek a neilo a, a pawmpui lo bawk a ni.

Tichuan heng SEBI, RBI, IRDA, AMFI leh PFRDA te hian mupui him zawk nan kaihhruaina dan an siam a, a vil tute an lo ni ta a ni.

Social Media hrang hrang ah hian fakna a tam thin a, Fake Account te, Certified nihna pawh neilo te hian it awm tak, that hmel si, rinawm taka lang si hian an rawn tarlang nasa thei si a, vawikhat en naah kha chuan awih nghal zel loh tur ani tawp mai. Finfiah dan kan rawn tarlan tawh ang khan SEBI, RBI, IRDA, AMFI hnuaia awm anni em, Certified anni em tih te hi chik zel tur a ni. Crypto Currency lam reng reng phei chu fimkhur a ngai lehzual tih kan lo hre tawh dawn nia.

Mizo te hi Financial finna lamah chuan kan la hnufual a, zirtur pawh kan la nghah, kan thenawm State te nen khaikhin pawhin kan hniam viau a ni. Hmasawnna tur kan la nei a, hma pawh kan sawn zel bawk ang, zirtirna tha kan mamawh tak kan dawn chuan Mizo te ti hmasawn thei tu pawimawh tak pakhat chu Financial finna hi ani a, bumna lakah kan him theih nan pawh a pawimawh takzet a ni.

Ilo him tlang zel ang u.

https://youtu.be/MSq1kRa7cQU?si=L-UjrV35pCdIZA2V